ተስፋዬ መቆያ እና ኃይለጊዮርጊስ ጥላሁን የአገልጋዮች ጉባኤ ተጠሪ ነን አሉ



ተስፋዬ መቆያ እና ኃይለጊዮርጊስ ጥላሁን



ባለፈው ቅዳሜና እሁድ በአሜሪካን መዲና በሆነችው ዋሽንግተን ዲሲ ላይ "የአገልጋዮች ጉባኤ" በሚል ከተቋቋመ ሦስት ዓመታትን ያስቆጠረው ጉባኤ ጉባኤውን እንደተለመደው በዋሽንግተን ዲሲ ላይ ርዕሰ አድባራት ቅድስተ ማሪያም ቤተክርስቲያን ማድረጉን ሰምተን ነበር፣ ከተለያየ ቦታ የመጡ የቤተክርስቲያን አገልጋዮች፣ ካሕናት፣ ዘማሪያን፣ እንዲሁም ቅዱስ ሲኖዶስ ሕገወጥ ሰባኪያን እና ዘማሪያን ብሎ በማንኛውም ዓውደ ምሕረት ላይ ቆመው እንዳይሰብኩ ወይም እንዳይዘምሩ የተለዩትም ዘማሪያን በቦታው በተጋባዥነት ተገኝተው ነበር።



 እንደ ማኅበሩ አወቃቀር ከሆነ አገልጋዮች በአንድነት በመሆን በተለይ በእናት ቤተክርስቲያን እና በገለልተኛ  አስተዳደር ስር ያሉትን አገልጋዮች ለማቀራረብ ብሎም ምዕመናኑን ወደ አንድ መዋቅር ለማምጣት የተጀመረ ጉባኤ እንደነበረ ከመስራቾቹ መካከል ከነበሩት ሰዎች ለመረዳት ችለናል፥ ነገር ግን ከባለፈው ዓመት ጀምሮ እራሱን የቤተክርስቲያን የውጪጉዳይ ተጠሪ ነኝ በማለት ተሰብሳቢውን ሲያደናግር የጥቅም አጋሩም ተስፋዬ መቆያ በመተባበር ተስብሳቢውን በተለያየ መንገድ ሲያደናግሩት ውለዋል፣ ገና ከመጀመሩ የጉባኤውን መርኃግብር ደብቀው አቆይተው ጸሎት ከተደረገ በኃላ ሲያወጡት ከላይ የተጠቀሰው ቅዱስ ሲኖዶስ ያገደው ዘማሪ ነኝ ባዩ ትዝታው ሳሙኤል በተስፋዬ መቆያ ጋባዥነት በጉባኤው እንዲዘምር በመርኃግብሩ መካተቱ ያበሳጫቸው ጥቂት የጉባኤው ታዳሚዎች ከሰውየው ጋር የግል ጥላቻ የለንም ነገር ግን ልዩነታችን የሃይማኖት ስለሆነ እናንተም እርሱን ጋብዙት እኛም ከዚህ በኃላ የጉባኤው ታዳሚ አንሆንም ብለው መውጣት ሲጀምሩ፥ ለስድብ የታደለው ተስፋዬ መቆያ በለመደ አፉ "ተዋቸው ማኅበረ ቅዱሳን ልኳቸው ነው" በማለት ሲያጥላላ በዓውደ ምሕረት ላይ ተሰምቷል። በዚህም ነበር ብዙዎች በማዘናቸው ጉባኤውን እየረገጡ ስለወጡ ዘላለም ወንድሙ "እባካችሁ ጉባኤ ረግጣችሁ አትውጡ" በማለት ሲማጸን የነበረው፤ ይህንኑ ተከትሎ ከሁለት ሰዓት በላይ ውይይት ተደረጎ የጉባኤውን ተሳታፊ ለማሳመን ትዝታውን እናስወጣዋለን እናንተ ብቻ ቁጭ በሉልን በማለት ለማደናገርም ተሞክሮ እንደነበር ከሥፍራው የደረሰን መረጃ አቀባያችን ጨምሮ ገልጸውልናል።

ኃይለጊዮርጊስ ጥላሁን በመጀመሪያ ለቅዱስ ፓትሪያሪኩ ባለው ቅርበት በሕገወጥ መንገድ ተሹሞ ሹመቱን ይመልከቱ ያለቅዱስ ሊኖዶስ እውቅና፣ ሌላው ቢቀር ያለ ቋሚ ሲኖዶሱ እውቅና፣ ያለ ቤተክህነቱ እውቅና በመሾሙ እና በወቅቱ በሰሜን አሜሪካ የሚገኙት የሦስቱ አህጉረ ስብከት ሊቃነ ጳጳሳት አሠራሩ ሕገ ቤተክርስቲያንን ያልተከተለ እንደሆነ በመጠቆም ለቅዱስ ፓትሪያሪኩ እንዲሁም ለቅዱስ ሲኖዶስ አባላት በሙሉ አቤቱታቸውን በማሰማታቸው፥ በቅዱስ ሲኖዶስ የጥቅምት ጉባኤ ላይ የወጪ ግንኙነት ተብሎ በቅዱስ ፓትሪያሪኩ ልዩ ፈቃድ ተከፍቶ ሲንቀሳቀስ እንደቆየ ቢታወቅም በጥቅምቱ የቅዱስ ሲኖዶስ ምልዓተ ጉባኤ ላይ የቤተክርስቲያኒቱን ቃለዓዋዲ ያልተፈቀደለት፣ ቀኖናን የሚጥስ፣ ከሕገቤተክርስቲያን ጋር የሚጣረዝ በመሆኑ ኦፊሻሊ የተዘጋ ጽ/ቤት ሆኖ ሳለ በብጹዕ አቡነ ፋኑኤል እምቢተኝነት ሥራውን እንደቀጠለ ነው፣ እንደውም ይህ ጽ/ቤት የቤተክርስቲያኒቱን ህግ በተጻረረ መልኩ ሹመት ሁሉ መስጠት እንደጀመረ ቀደም ብለን በዜናችን ላይ ማስነበባችን ይታወሳል። የዲያቆን ዘላለም ወንድሙ ሹመት እና በመቀጠል ደግሞ የአባ ጽጌ ድንግል ሹመት በማድረግ ነው በሕገወጥ መንገድ እየተንቀሳቀሰ ያለው። ይህ ጽ/ቤት በመጀመሪያ የሚመራው ቤተክርስቲያን በማታውቀው ጥቁር እራስ ድቁናውን ያፈረሰ በሆነ ሰው ቢሆንም እነ ተስፋዬ መቆያ የዓላማ ግንኙነት ስላላቸው አብረው እየሰሩ እና ሥርዓት አልበኞች የሚሰበሰቡበት ጉባኤ መሆኑ ብዙዎችን አሳዝኗል።

በተጨማሪ በዚሁ እለት ኃይለጊዮርጊስ ጥላሁን ከቅዱስ ፓትሪያሪኩ በቀጥታ በተጻፈ ደብዳቤ ኃይለጊዮርጊስ ጥላሁን የውጪ ግንኙነት ተጠሪ በመሆኑ እና የመጀመሪያውም ሰው ለዚህ ጉባኤ እውቅና ሰጪውም እርሱ በመሆኑ ቅዱስ ፓትሪያሪኩ በጻፉት ደብዳቤ ላይ እንደተገለጸው ጉባኤው ኃይለጊዮርጊስን እንደበላይ ኃላፊ አድርጎ እንዲቀበለው አበክረው መግለጻቸውን ደብዳቤውን ለተሰብሳቢው በሙሉ በንባብ አሰምቷል። ብዙዎችም "ምነው የእስራኤል አምላክ ሆይ ምነው የዚህችን ቤተክርስቲያን ጻሯን አበዛህው" በማለት ምሬታቸውን በግልጽ ተናግረዋል፥ መጀመሪያ ቤተክርስቲያንን እናገልግል ብለን ብንሰባሰብ ማንነቱ የማይታወቅ ሰው አምጥተው ይምራችሁ ይሉናል "መጀመሪያ እራሱን እና ሕይወቱን መምራት ያቃተው ሰው" እንዴት ሊመራን ይችላል ብለዋል፤ ለዚያውም በቅዱስ ሲኖዶስ ሕገወጥ ሆኖ በተዘጋ ጽ/ቤት እንዴት እንመራለን ባዮች ናቸው፣ በመቀጠልም የተሃድሶ አቀንቃኞቹ በመጀመሪያ በተሰፋዬ መቆያ ሲያዋዙ ቆይተው ጭራሽ ማንም ምንም ሊያደርግ አይችልም በሚል ይመስላል ትዝታውን አምጥተው ለማዘፈን መሞከር እኛን ብቻ ሳይሆን ቤተክርስቲያኒቱንም ንቀዋት ነው እንዲህ ሕገ ወጥ ሆነው ለመንቀሳቀስ የሚሞክሩት ብለው ነበር።

ይህ በእንዲህ እንዳለ የትዝታው ሳሙኤል፣ የዘርፌ ከበደ፣ የምርትነሽ ጥላሁንን ወደ አሜሪካ መግባት ብዙዎችን አነጋግሯል፣ ቀደም ብለን እንደዘገብነው ብጹዕ አቡነ ፋኑኤል እንዳስመጧቸው ብናውቅም ነገር ለሰው ጆሮ ተብሎ ስደተኛው ሲኖዶስ ነው ያስመጣው በማለት ወሬዎቹን በሰፊው ማስወራት ጀምረዋል፣ ይልቁንም ባለፈው የጥምቀት በዓል ላይ በሎስ አንጀለስ የስደተኛው መቀመጫ እና መናኽሪያ በሆነው ቦታ ተገኝቶ ዝማሬ አይሉት ዘፈን  እንዳቀረበ ከቦታው የዘገቡልን ባልደረቦቻችን ገልጸውልናል። እውነት ተሃድሶያኑ በብፁዕ አቡነ ፋኑኤል ጀርባ ሆነው ቤተክርስቲያንን እንዴት ሲወጉ ይኖራሉ? ሕዝበ ክርስቲያኑንስ እስከመቼ እያታለሉ ይኖራሉ? ለዚህም ምስክሩ ደግሞ ባለፈው ቅዳሜ በደብረ ምሕረት ቅዱስ ሚካኤል አዳራሽ ብፁዕ አቡነ ፋኑኤል እና አዲስ የሾሙት የቦርድ አባላት ጋር ቅልጥ ያለ ድግስ ደግሰው የተናገሩት ምስክር ነው ብለን እናምናለን፤ እንደደረሰን ለአንባቢ እናደርሳለን።

ለቅድስተ ማሪያም የቦርድ አባላት እንዲሁም ምዕመናን ተስፋዬ መቆያ በአውደ ምሕረት ላይ ቆሞ በተለያየ ጊዜ የሚያስተላልፋቸው የጥላቻ መልዕክቶች፣ ዓውደ ምሕረት ላይ ቆሞ ለምን ተቆጣ በቅርብ ጊዜ በይርጋ ጨፌ ኢትዮጵያ ተገኝቶ የፈጸመው አስነዋሪ ድርጊት፣ እውን ተሃድሶ የለም ?   ማንን ለማሳሳት ተሃድሶ የለም ይባላል አሁን ደግሞ ይባስ ብሎ በቅድስት ማሪያም አደባባይ ላይ የተሃድሶ አቀንቃኝ የሆነው ትዝታው ሳሙኤልን አምጥቶ አገልግል ማለት ሰዎቹ የዓላም ግንኙነት እንዳላቸው ያሳያል፣ እንዴት እንደዚህ ታደርጋላችሁ ብለው የሚጠይቁትን ደግሞ "እናንተ የማኅበረ ቅዱሳን መልዕክተኞች" በማለት እየዘለፈ የሚገኝ ሰው ነው፤ የተለየ ችግር ካለበት በሌላ ቦታ ሊያደርገው ሲችል በዓውደ ምሕረት ላይ ቆሞ ሰውን መዝለፉን ትቶ ሕዝበ ክርስቲያኑን ለንሰሐ ቢያበቃ ምልካም ነው ብለን እናምናለን።

በመጨረሻ በዚህ ጉባኤ ተካፋይ ለሆናችሁ አባላት አገልጋዮች፣ ". . .እናንተ ካህናት፥ ማቅ ታጥቃችሁ አልቅሱ እናንተም የመሠዊያ አገልጋዮች፥ ዋይ በሉ እናንተ የአምላኬ አገልጋዮች፥ ኑ፥ ሌሊቱን ሁሉ በማቅ ላይ ተኙ።. . ." ትንቢተ ኢዩኤል እንደተጠቀሰው እያንዳንዳችሁ አገልጋዮች ካህናት፣ ዲያቆናት፣ ዘማሪያን እንዲሙም ምዕመናን ወቅቱ የሱባኤ ወቅት ነው ቤተክርስቲያናችንን ከመናፍቃን፣ ከከሃዲያን፣ ከተሃድሶ እንዲታደግልን አብዝተን ወደ ፈጣሪ ልንጮህ ይገባናል። ልቅሶአችንን ሰምቱ ገጸ ምሕረቱን ወደ እዚች ቤተክርስቲያን እንደሚመልስ ሙሉ እምነታችን ነው፤ ለዚህም ደግሞ እያንዳንዱ ከእናት ከአባቶቻችን እንዲሁም ከአያቶቻችን የወረስነውን (የተረከብነውን) ንጽህይት፣ ርትዕይት፣ ብሔራዊት የሆነችውን ቤተክርስቲያን ከአጽራረ ቤተክርስቲያን የመጠበቅ እና የማስጠበቅ ሃላፊነት በሁላችንም ላይ መሆኑን አበክረን ለመግለጽ እንወዳለን።

ቸር ወሬ ያሰማን

የመላው ዓለም የተዋሕዶ ቤተሰብ