አስኬማው የለንም እንጂ እኛም ጳጳስ መሆን እንችላለን (የትዝታው ሳሙኤል ግሩፓች)



የሥርዓት አልበኞቹ ግሩፕ ቀንደኛ መሪዎች



(አንድ አድርገን ታህሳስ 11 ፤ 2004)፡- በዲላ ቅዱስ ሚካኤል ቤተክርስትያን ህገወጥነት እና ስርዓት አልበኝነት በፊት እነ በጋሻው ደሳለኝ እና ትዝታው ሳሙኤል ባስመረጧቸው የሰበካ ጉባኤ አባላት እየተከናወነ መሆኑን ለማወቅ ችለናል ፤ አሁን በስራ ላይ የሚገኝውን የሰበካ ጉባኤ እንዲበተን እና በምትኩ ህዝቡ ይሆኑኛል ፤ ቤተክርስትያኗን ለማተዳደር እውቀቱም ሆነ ብቃቱ አላቸው ያላቸውን ሰዎች እንዲመርጡ የሀገረስብከቱ ሊቀ ጳጳስ የተፃፈ ደብዳቤ ከሳምንት በፊት በእጃቸው ደርሶ ነበር፡፡ ነገር ግን ፓትርያርኩም ሆነ የሀገረስብከቱ ሊቀ ጳጳስ በዚህ ጉዳይ ላይ ምንም አያገባቸውም በሚል እሳቤ ሰውን ለሌላ ብጥብጥ ለማነሳሳት የቤተክርስትያ አስተዳዳሪው የኛ የሚሏቸውን ሰዎች  እየሰበሰቡ ይገኛሉ፡፡

በፊት የነበረው ሰበካ ጉባኤ በእነ በጋሻው እና ትዝታ ሳሙኤል ገፋፊነት እነርሱ ያቀረቧቸውን ሰዎች ያስመረጡ ሲሆን ቀድሞም ቢሆን አካሄዱ ትክክል ስላልሆነ ተቃውሞ ገጥሞት ነበር፡፡ ለእነሱ አላማ የሚያስፈፅም ቃላቸውን የሚሰማ ፤ ተግባራቸውን የሚያደርጉ ሰዎችን ነበር ማስቀመጥ የቻሉት ፡፡ ለዘመናት ዲላ ሚካኤል ላይ አውደ ምህረቱን ቅዱስ ሲኖዶስ ሲከለክል እነዚህ አባላት በመፍቀድ ሲያስፈነጩበት ከርመዋል፡፡ የህዳር የቅዱስ ሚካኤል ጉባኤ የመላእኩን ስም ሰውን አስረስተውት የትዝታው ጉባኤ እስከመባል ደርሶ ነበር ፡፡ አሁን ግን ስራቸው ተመዝኖና ፤ ግራ ቀኙ ታይቶ የቤተክርስያኑ ሰበካ ጉባኤ እንዲበተን እና አዲስ ሁሉ ምዕመን በተገኘበት የምርጫ ፕሮግራም እዲደረግ በደብዳቤ መልክ ከሀገረስብከቱ ቢደርሳቸውም ፤ ‹‹ቤተክርስትያኗ የምትተዳደረው በህዝቡ እንጂ በማንም አይደለም›› በማለት በግብር የሚመስሏቸውን ሰዎች ሰብስበው በመነጋገር የጋራ አቋም በማስቀመጥ ፤ እምቢተኛነታቸውን በቃለጉባኤ በማስደገፍ ተሰብስበው ተፈራርመዋል፡፡

በስብሰባ ላይ ከተገኙት ምግባርም ሆነ ስርአተ ቤተክርስያንን የማያውቁ ሰዎች ፤ ‹‹አስኬማው የለንም እንጂ እኛም ጳጳስ መሆን እንችላለን›› ጳጳሱ የሚሠሩት እኛ የማንሰራው ምንም ነገር የለም ብለው ሲናገሩ አርፍደዋል፡፡ በሌላ በኩል እነዚህን ሰዎች የሚቃወሙ ስርአተ ቤተክርትያን ይከበር የሚሉ ሰዎች ፤ የሀገረ ስብከቱ ትዕዛዝ እንዲከበር አጥብቀው እየተሟገቱ ሲሆን ፤ ጉዳዬ መፍትሄ እንዲያገኝ ወደ ጠቅላይ ቤተክህነት መምጣቱን ለማወቅ ችለናል፡፡

 

እንደሚታወቀው ባለፈው የጥቅምት ጉባኤ ላይ የአዲስ አበባ ሰንበት ት/ቤቶች አንድነት ሕገወጦቹን ሰባኪያንና ዘማሪያን ቅዱስ ሲኖዶስ የማያዳግም መልስ ይስጥልን፣ ቤተክርስቲያናችንን አይክሉም የሚል ጥያቄ ባቀረቡበት ወቅት፥ እነዚሁ ሕገወጥ ሰባኪያንና ዘማሪያን በቅዱስ ፓትሪያሪኩ ባቀረቡት አቤቱታ በበኩላቸው በሐዋሳ ከተማ ያለአግባብ ከቤተክርስቲያናችን ተገፍተናል፣ ተሰደናል በሚል ምክንያት ቅዱስ ፓትሪያሪኩን ተጠሪነቱ በቀጥታ ለመንበረ ፓትሪያሪኩ የሆነ ቤተክርስቲያን እንዲተክሉላቸው ያቀረቡትን ጥያቄ የተቀበሉት በሚያስመስል መልኩ የሀገረ ስብከቱ ሊቀ ጳጳስ ጉዳዩን ሊመለከቱት አይችሉም መባሉ በብዙ ታዛቢዎች ዘንድ ብዥታን የፈጠረው የፓትሪያሪኩ አካሄድ እንደገና ጥያቄ ውስጥ እንዲገቡ ሳያደርጋቸው የሚቀር አይመስልም። በሌላ በኩል አቡነ ፋኑኤል የሀረ ስብከቱ ሊቀ ጳጳስ በነበሩበት ወቅት ቅዱስ ሲኖዶስ በ፳፻ ዓም ባስተላለፈው ውሳኔ ሰባኪያኑ እና ዘማሪያኑ ሁኔታዎች እስኪጣሩ በየትኛውም የቤተክርስቲያን አውደ ምሕረት ላይ እንዳይሰብኩ እና እንዳይዘምሩ የተላለፈውን ውሳኔ፣ አቡነ ፋኑኤል በኔ ሀገረ ስብከት ዲሞክራሲ ሞልቷል በሚል ማንም ሊከለክላችሁ አይችልም በማለት የቅዱስ ሲኖዶስን ውሳኔ በማናለብኝነት ሽረው ሰባኪያኑን እና ዘመሪያኑን የልብ ልብ ሰጥተው እንዲንቀሳቀሱ ያደረጉ አባት መሆናቸው አይዘነጋም፥ በወቅቱም ከፓትሪያሪኩም ሆነ የቤተ ክህነቱ ምንም አይነት ጥያቄም ሆነ አስተያየት ስላልቀረበላቸው በተመሳሳይ ማናለብኝነት ሥራቸው ይህው እስከ ዛሬ ቀጥለውበት ይገኛሉ።

አሁን ስራውን እንዲያቆም የተወሰነበት ሰበካ ጉባኤ የምርጫው ሂደት ላይ ራሳቸው ተመራጭ ፤ ራሳቸው ፔቲሽን ሰብሳቢ ፤ ራሳቸው ቆጣሪ ፤ ሆነው ነበር ምርጫውን ያከናወኑት፡፡ በቦታ ላይ ብዙ ተከታይ ያላቸው የእነ በጋሻው ግሩፕ የተቀነባበር የምርጫ ትርኢት ነበር፡፡ አሁን ግን በቃችሁ ሲባሉ ‹‹አይበቃንም ፤ ማንም ከህዝቡ ውጪ ስለቤተክርስትያኗ የሚያገባው የለም›› የሚል ፤ ከስርአተ ቤተክርስትያን ያፈነገጠ አካሄድ ይዘው የሚመጣውን ትዕዛዝ እየተጠባበቁ ይገኛሉ፡፡

ከአንድ አድርገን የተወሰደ

የመላው ዓለም የተዋሕዶ ቤተሰብ